Ռոբերտ Քոչարյան՝ բանտարկուած Ընդդիմութիւն, քաղաքական պատանդ, քաւութեան նոխազ

Ռոբերտ Քոչարյանի բանտարկութիւնը այսօր դարձեալ երկարաձգուեցաւ, եւս երկու ամիսով:

Առաջին կալանաւորումէ մը ետք զորս բեկանուեցաւ դատաւորի մը կողմէ, երեքէն աւելի ամիսներէ ի վեր, ան բանտարկուած է արդէն: Այժմ, գոնէ երկու ամիս եւս: Մինչ տակաւին ըստ էութեան ո՛չ մէկ դատավարութիւն տեղի ունեցած է: Դատավարութեան թուական մը իսկ, չէ ճշդուած:

Քոչարյանի դէմ յօրինուած առաջին եւ նախնական մեղադրանքը լրիւ քաղաքական հալածանք է: Օրինական գետնի վրայ, անհեթեթութեան գագաթնակէտն է: Անկէ ետք, տեսնելով թէ այդ հնարքը պիտի չդիմանայ նոյնիսկ նախադատական շինծու, թելադրանքի տակ, ձեւական գործընթացին,  աւելցուցին դրամական բնոյթի իբրեւ թէ մեղադրանք մը, միմիայն մէկ հատիկ անձի մը պղտոր ցուցմունքին համեմատ, որ ոչ միայն իր խօսքէն զատ որեւէ փաստ չունի, այլ չկարողացաւ իր խօսքերովը իսկ հաստատել Քոչարյանի կապը իր պատմածին հետ:

Գրեթէ տարիէ մը ի վեր պետական բոլոր միջոցներն ու լծակները իրենց ձեռքը ունենալով հանդերձ, Հայաստանի այժմու իշխանութիւնը անկարող է ուրեմն փաստելու հսկայական «թալանի» վերաբերեալ այդ բոլո՜ր ըսի-ըսաւները որ կը լսէինք, Քոչարյանի մասին: Անկարող են նոյնիսկ բաւարար չափով կեղծ փաստեր սարքելու, հնարելու, այդ ուղղութեամբ:

Իրաւապահ մարմիններու ամենաբարձրաստիճան տնօրէններու հեռախօսային փոխանակումներու ձայնագրութիւնները հրապարակուեցան, յստակօրէն փաստելով որ գոնէ անոնց ճնշումին եւ ազդեցութեան տակ է որ դատաւորները որոշում կ’առնեն, այս նիւթին մէջ:

Նկատի ունենալով որ, իրենց այդ խայտառակ խօսակցութեան ձայնագրութիւնները հանրային դառնալէ ետք, այդ ոստիկանապետները հանգստօրէն մնացին իրենց պաշտօններուն վրայ, կը նշանակէ թէ խնդրոյ առարկայ դատաւորները նաեւ հլու-հնազանդ ենթարկուած են կառավարութեան կամքին, Վարչապետի ցանկութիւններուն:

Ի դէպ, նոյն արձանագրութիւններու ընթացքին կը խօսուի օրինական փորձագէտի մը մասին, որ պատեհօրէն կը գործածուի այժմու իշխանութեան կողմէ, ձեւականօրէն ընդունելի դարձնելու համար դատարանին այլապէս անհիմն որոշումները: Իշխանութիւնը այդ փորձագէտը յառաջիկային պիտի նշանակէ Հայաստանի Սահմանադրական Դատարանի անդամ, որուն նաեւ նախագահը կրնայ դառնալ ան: Յաւելեալ հարուած մը՝ այդ երկրին մէջ Դատական Իշխանութեան անկախութեան եւ Օրէնքի Գերակայութեան վերաբերեալ որեւէ երազանքներու, եթէ դեռ կան: Նշենք որ այս գետնի վրայ, լոկ երեւոյթները իսկ բաւարար են, գոյացնելու համար խնդիրը, վարկաբեկելու համար պետական հիմնարկութիւնները:

Միակ պատճառը որ Ռոբերտ Քոչարյանի բանտարկուած է, այն է, թէ ինք միակ իսկական եւ ազդու քաղաքական ընդդիմադիրը կրնայ հանդիսանալ այժմու իշխանութեան:

70% ազատ եւ խանդավառ քուէներ հաւաքած իշխանութիւնը, որու հարկային պատանդն է նաեւ Խորհրդարանի յաւելեալ տոկոս մը  կազմող կուսակցութեան մը լայնավիզ ղեկավարը, այն աստիճան կը վախնայ ուրեմն Քոչարյանի քաղաքական ընդդիմական ուժէն, որ զինք ճաղերու ետեւ կը պահէ: Ի դէպ, նոյն իշխանութիւնն է որ ջանաց Արեւմուտքին բառացիօրէն ծախել այն խաբկանքը, թէ Ժողովրդավարութեան մակարդակը կը բարձրացնէ, Հայաստանի մէջ:

Արցախը, ինչպէս նաեւ Հայաստանի ռազմական դաշնակից՝ Ռուսաստանի իշխանութիւնները, բազմիցս եւ այլազան ձեւերով, յստակօրէն յայտնեցին իրենց դժգոհութիւնը, ընդվզումը, վիրաւորանքը, այս ծանր անարդարութեան դէմ: Երեւանը մնաց սակայն անայլայլ, իր անվայել, վնասակար եւ անպատասխանատու կեցուածքին մէջ, այս էական խնդրի կապակցութեամբ:

Այս ամէնը ծանր հետեւանքներ պիտի ունենայ անկասկած. որոնք սակայն պիտի վիճակուին ոչ միայն Հայաստանի այժմու իշխանաւորերուն, այլ մեր բոլորին, ամբողջ երկրին, համայն Հայութեան:

Աւելի ընդլայնուած, նախնական պաշտպանողական՝
https://haytougchamlian.blog/ռոբերտ-քոչարյան-պաշտպանողական-2018/

Մեթր Հայդուկ Շամլեան, Գանատա

15.03.2019

Վերադարձ դէպի գլխաւոր էջ