Հայոց Ցեղասպանութիւնը ընթացքի մէջ է

Ներկայ Թուրքիան պատասխանատուութիւն կը կրէ Հայոց Ցեղասպանութեան կապակցութեամբ:

Մինչեւ օրս, պետական կառոյցներէն սկսեալ մինչեւ այլազան հասարակական  կազմակերպութիւններ ու քաղաքացիական շրջանակներ, հայոց ցեղասպանութեան նկատմամբ Թուրքիոյ ծրագրած, կազմակերպած եւ գործադրած դրած Հայոց Ցեղասպանութեան ժխտումը, ուրացողականութիւնը, կը հանդիսանայ բացայայտ մեղսակցութիւն, Իթթիհատի օրերուն կատարուած նիւթի առարկայ ոճիրին:

Սակայն ուրացողութեան եւ դէպքէ-ետք-մեղսակցութեան վերաբերող կէտերէն անդին, այսօրուայ Թուրքիան արդէն նաեւ է՝ ուղղակի հեղինակը եւ գործադրիչը հայոց ցեղասպանութեան:

Նիւթի առարկայ ոճիրի գործադրութիւնը վերջ չէ գտած 1915-ին, ոչ ալ այդ թուականին մօտ, այլ կը շարունակուի մինչեւ այսօր:

Այս դրութիւնը կը բնորոշուի հետեւեալ տուեալներով եւ իրողութիւններով՝

.   Իր նախնական բնօրրանը հանդիսացող տարածքաշրջանին ու պապենական հողերու վրայ Հայութեան ներկայութեան, գոյութեան եւ իրաւունքներու շարունակական անընդհատ բնաջնջում, բոլոր մակարդակներու վրայ

.  Թուրքիոյ կողմէ տեւական քաջալերանք, զօրակցութիւն եւ համագործակցութիւն՝ Կովկասի թուրքերու կողմէ տարածքաշրջանի  հայութեան դէմ գործուած ցեղասպանական անթիւ ոճիրներու նկատմամբ՝ Պաքու, Սումկայիթ, Կիրովապատ, Արցախ…:  Նոյնպէս՝ Նախիջեւանի մէջ, ուրկէ դատարկելէ ետք հայերը, անոնց շիրմաքարերն ու խաչքարերն է որ թիրախը դարձան թրքական հայատեաց ու ցեղասպան մոլուցքին:

.  Անցած 28 տարիներու ընթացքին Հայաստանի Հանրապետութեան դէմ թրքական հիմնական դիրքորոշումը, քաղաքականութիւնը եւ նոյնիսկ զինուորական ոտնձգութիւնները ու յարձակումներ, որպէս շարունակութիւն հայոց ցեղասպանութեան, հայութեան անհետացման, եւ բանթուրանական ծրագրի գործադրութեան:

Հայաստանի Հանրապետութեան Վերանկախացման գործընթացի ժամանակամիջոցին, Թուրքիան նոյնիսկ ուսումնասիրեց Սարդարապատի ճակատամարտի կրկնութեան պատեհութիւնը:

Սակայն այդ ծրագրային տուեալէն զատ, գործնական եւ իրական, ռազմական գետնի վրայ, 1992-ին, կովկասեան թուրքերու ներխուժում գործադրուեցաւ եւ հետեւաբար հայ-թրքական պատերազմ տեղի ունեցաւ, Հայաստանի Հանրապետութեան հիւսիս-արեւելեան սահմանի ներսի կողմը… Մինչեւ օրս, Հայաստանի այդ սահմանագծին վրայ, թուրք զինուորներ տեւաբար կրակ կը բանան հայ զինուորներու վրայ:  Ազրպէյճանի թուրքին եւ Թուրքիոյ թուրքին միջեւ նոյն տարբերութիւնն է որ (չ)կայ հայաստանցիին եւ արեւմտահային միջեւ:

Եւ դեռ այստեղ չենք խօսիր Արցախի ճակատի մասին… Ուր, օրինակի համար միայն, անցեալ շաբթուայ մէջ, 230 դէպքերու առիթով, 2000-է աւելի թրքական փամփուշտներ կրակուեցան հայերու վրայ: Նկատի ունենալով Թուրքիոյ եւ Ազրպէյճանի ամէն էական տեսակէտէ նոյնութիւնը այս նիւթին մէջ, որպէս բանթուրանիզմի այժմէական գործադրում, ընթացիկ եւ իսկական կիրառում, այդ 2000 փամփուշտներէն ամէն մէկը շարունակութիւնն է հայոց Ցեղասպանութեան:

Թուրքիոյ կողմէ Հայաստանի Հանրապետութեան Շրջափակումը, որ ուղղակիօրէն կապուած ըլլալով Արցախեան պատերազմին, կը կրէ ուղղակի ռազմական բնոյթ, նոյնպէս կը միտի տնտեսապէս ու բարոյապէս շնչահեղձ ընելու Հայաստանն ու Հայութիւնը, թոյլ չտալով որ անոնք կազդուրուին ու վերականգնին, վտանգի ենթարկելով անոնց գոյատեւումը, ու ջանալով այդպէս տակաւին իր լրումին հասցնել «Միութիւն եւ Առաջդիմութիւն» կուսակցութեան գործն ու նպատակները:

Հայաստանի Հանրապետութեան բնականոն զարգացումն ու վերականգնումը արգիլող ու խափանող  Թուրքիոյ այս ծրագրի ու գործունէութեան թիրախը նաեւ Սփիւռքի Հայութիւնն է: Ան այս կացութեան մէջ, չունենալով զանգուածային հայրենադարձութեան իրապաշտ այլընտրանք, կը շարունակէ կրել իր ինքնութեան աստիճանական կորուստը: Աշխարհի չորս կողմ ցիր ու ցան եղած Ցեղասպանութեան վերապրողները, այսպէսով, ներկայ Թուրքիոյ դիտումնաւոր ու կանոնաւոր ջանքերով, կը շարունակեն ենթարկուիլ հայոց անէացման ցեղասպանական ծրագրին:

. Բոլոր մասնագէտներու հաստատումով, եւ անշուշտ ոչ միայն Հայոց Ցեղասպանութեան պարագային, ուրացողականութիւնը ինքնին հիմնական մասնիկն է Ցեղասպանութեան ոճիրին, որու յետին ու ծայրագոյն հանգրուանը կը հանդիսանայ, լրումը կ’ապահովէ:

Այս ըմբռնողութեամբ եւս Հայոց Ցեղասպանութիւնը դուրս կու գայ պատմութեան պատկանող նիւթի մը հանգամանքէն, դառնալու համար այժմէական եւ ընթացքի մէջ իրականութիւն:

1915-ը այսօր է, վաղն է, եւ այսպէս շարունակաբար…

Միակ տարբերութեամբ, որ հայերը սորվեցան պաշտպանուիլ:

Ի հարկին նաեւ՝ հակադարձել…

Հայդուկ Շամլեան

24 Ապրիլ 2019

Վերադարձ դէպի գլխաւոր էջ