Ամուլսարը՝ Փաշինյանի փրկութեան սկիզբն է

Ապրիլ 2018-էն ի վեր, շարունակաբար, ստորագրեալը գաղափարականօրէն Նիկոլ Փաշինյանին դէմ է, եւ այդ կեցուածքը յայտնած է, բազմիցս, վճռական, հրապարակային եւ գրաւոր կերպով: 

Այսօր սակայն, առաջին անգամ ըլալով, համաձայն եմ Պարոն Փաշինյանին հետ:

Քանզի առաջին անգամ ըլլալով, վերջապէ՛ս, ան իր ձեռք բերած վեհագոյն Պաշտօնին արժանավայել վարքագիծ ցուցաբերեց: Լաւ է ուշ, քան երբեք:

 Իր նախնական զօրակիցներէն անոնք որոնք հիմա դժգոհ են,

. կամ՝ ի սկզբանէ ապուշներ էին (բառին գիտական իմաստով), եւ ցմահ մնալու են այդպէս,

. կամ ել՝ իրենք զիրենք շատ խորամանկ ու ճարպիկ կարծելով, «մարտավարական» պատճառներով, իրեն աջակցիլ ձեւացուցին:

Երկու պարագաներուն ալ, հիմնական յանցաւորը Փաշինեանը չէ:

Այս ամէնը բացարձակապէս նախատեսելի էր, առաջին օրէն իսկ սկսեալ:

Ան որ երբեւիցէ հաւատաց որ այդ հանքը փակ կը մնայ, կամ շատ հեշտօրէն խաբուեցաւ, կամ ալ ինքզինք խաբուիլ ձեւացուց – երկրորդ պարագային, ստորագնահատելով նաեւ այն անձը իսկ որուն իբրեւ թէ աջակցիլ կը կեղծէր – :  Ի դէպ, այս նոյն հաստատումը չի սահմանափակուիր Ամուլսարի նիւթով, այլ լիովին ի զօրու է՝ այն բոլոր «յուսախաբութիւններու» պարագային որ ապրեցան կամ դեռ շատ պիտի դիմագրաւեն Յեղափոխութեան սկզբնական ջատագովներն ու զօրակիցները:

 Հիմա, կը մնայ՝ երկու խնդիր միայն: 2 հատ միայն!, շատ չէ…: Քոչարյանը, եւ Փութինը: Արցախի խնդիրը ինքնաբերաբար կը լուծուի, այդ երկուքին ընդմէջէն : (Ոչ թէ լրիւ Հիմնախնդիրը կը լուծուի, այլ՝ կը փարատին այն նոր վտանգները որոնք գոյացան Արցախի կապակցութեամբ, փաշինյանական շարժումի պատճառով: Ինչպէս նաեւ, կը դարմանուին Հայաստանի եւ Արցախի միջեւ՝ լուրջ ու տեւաբար սաստկացող լարուածութիւնները: )

Ուրեմն եթէ Փաշինյանը միայն այդ երկու խնդիրներն ալ յաջողի լուծել (այսինքն, յստակ ըլլանք՝ Քոչարյանը բանտէն դուրս հանէ, եւ ընդհանրապէս դադրի Փութինին հետ խաղալէ), ապա ստորագրեալը, առանց տակաւին համակիրը դառնալու՝ այսպէսով իր Պաշտօնին  արժանի դարձած այս անձին, այնուհետեւ կը սկսի նշանակալից չափով զսպել Հայաստանի նոր վարչակարգի դէմ իր քննադատութիւնները:

Արդէն իսկ Պարոն Փաշինյանին օգնել ջանալու համար, կ’առաջարկեմ նոյնիսկ որ՝ Քոչարյանին տեղ, Սերժ Սարգիսյանը բանտ նստեցնէ (lynch-mobը պէտք է կուշտ պահել), եւ հրապարակային կերպով, Արեւմուտքի  կառավարութիւններուն յստակօրէն յայտնէ որ ինք՝ իրենց գործիքը, իրենց խամաճիկը չի՛ լինելու:

Մեյ մը որ վերեւ պարզուած երկու էական խնդիրներն ալ լուծէ, այդպէսով իսկապէս իր պաշտօնին տիրացած Վարչապետը, ինք, մնացեալով բնաւ պէտք չունի մտահոգուելու, ոչ իսկ հետաքրքրուելու: Դա իր գործը չէ: Ոստիկանութիւնը եւ ազգային անվտանգութեան ուժերը կը կատարեն պէտք եղածը: ( Բանակի օրինաւոր միջամտութեան կարիքը իսկ չ’ըլլար այս անգամ, կացութիւնը այդտեղ չի հասնիր. այդ ժամանակները անցած են, երկիրը աւելի հասուն է: )

Մէկ ու կէս տարիէ ի վեր, առաջին անգամ՝ յոյսով,

Մ. Հայդուկ Շամլեան

Գանատա, 19.08.2019

Յ.Գ.

. Փաշինյանի համար սա անկիւնադարձային պահն է՝ կամ իր հաստատօրէն արտայայտած որոշումին վրայ կը մնայ, եւ կը դառնայ պետական իսկական ղեկավար, կամ ալ «հանրային ճնշումի» տակ միտքը կը փոխէ, եւ այլեւս անդառնալի կերպով կը բռնէ ձախողութեան ուղին, երկրին համար աղետալի հետեւանքներով:

. Տուգանքից վախենալով չէ որ կառավարութիւնը այս որոշումը կայացուց: Այլ, գիտակցելով որ այդ է որ կը պահանջէ երկրի շահը, կենսական մակարդակի մը վրայ, ի դէմ՝ ծայրայեղական իրարանցումին: Մնացեալը քաղաքական շատ նորմալ, սովորական գործելակերպ է:

. Սահման մը կայ Յեղափոխութիւնը շփոթելու հաւաքական ինքնասպանութեան, եռանդուն ինքնաքայքայումի հետ, եւ ողջունելի է որ այդ սահմանին գիտակից դարձաւ նոր վարչակարգը:

. .  Հայեր որոնք սկզբնապէս Փաշինյանին դէմ էին – ուղղամիտ կերպով ու առանց որեւէ հակառակ շահագրգռութեան – , Ամուլսարի հանքի վերաբերող այս անկիւնադարձային պահուն՝ համաձայն են իր հետ:

Ասոնք քանակն ալ կարող է համազօր լինել Փաշինյանի շրջապատի այն տարրերին, որոնք արդարեւ ոչինչ էին առանց իրեն, եւ որ հիմա այսքան արագօրէն ու թեթեւսոլիկ կերպով արդէն դաւաճանում են իրեն:

. Յուսանք որ այս առիթով ներքին մաքրագործում մը տեղի կ’ունենայ իշխանութեան մէջ, որպէսզի նրա անարժան, անատակ ու քանդիչ դերակատարները այնտեղից դուրս գան, եւ մնացեալները, Բանականութեան հիման վրայ, սկսին վերջապէս լրջօրէն աշխատիլ, կառավարել:

. Ես Ռոբերտ Քոչարյանի թունդ համակիր մըն եմ. ճակատաբաց, վճռակամ, առանց որեւէ բարդոյթի:

Սակայն այդ նիւթով խորապէս վրդոված լինելս չի նշանակում որ, որեւէ նիւթի կապակցութեամբ, որեւէ առիթով, անուղղամիտ կերպով, պիտի քննադատեմ Փաշինյանը:

Բազմաթիւ տեսանկիւններից կարելի է հիմնաւորել եւ նոյնիսկ արդարացնել Փաշինյանը կեցուածքի երեւութային փոփոխութիւնը, Ամուլսարի հանքի կապակցութեամբ:

Ամենապարզ ձեւը, դիտել տալն է որ դա շատ սովորական, նորմալ, բնակա՛ն բան է, քաղաքականութեան մէջ:

Սակայն գոնէ մի ուրիշ կէտ ալ նշենք այստեղ՝ եթէ Փաշինյանը հարկադրուեցաւ այդ հանքը բանալ, պատճառը այն է որ շատ մը հայեր, որոնք իրեն խանդավառ խոստումներ տուած էին, յատկապէս տնտեսական գետնի վրայ, դրժեցին իրենց այդ խոստումները:

Անոնք որոնք սկզբնապէս Փաշինյանին զօրակցեցան, պարզապէս իրաւասու չեն այժմ զինք վայրագօրէն քննադատելու…

. Հանրաքուէներով երկիր կը «կառավարեն» միայն այն իշխանաւորները որոնք ղեկավար լինելու անատակ են, կարողութիւնը չունին՝ իրենց պետական տարրական պատասխանատւութիւնները ստանձնելու:

Յատկապէս այս պարագային, այդքան մեծ համեմատութեամբ քուէներու շնորհիւ կառավարութիւն դարձած քաղաքական ուժը բնաւ կարիքը չունի, ամէն իսկական քայլի, հանրաքուէյի դիմելու: Դա համազօր կը լինի դժուար ու լուրջ գործից փախչելու:

Իսկ հակառակ կողմին համար, որ ոչ մէկ երաշխիք չունի որ հանրաքուէն ի նպաստ իրենց պիտի ընթանայ, այս միջոցաւ ուզում են միայն ժամանակ շահիլ:

. մոլեռանդ ակտիվիստները բանական, տրամաբանական խօսքերից բան չեն հասկնար, չեն կրնար հասկնալ. յատկապէս, իրենց բնաւ չեն հետաքրքրեր իրողութիւնները, առարկայական տուեալները. բացարձակ գաղափարամոլութեան դէմ՝ որեւէ դարման չկայ, ափսոս:

Վերադարձ դէպի գլխաւոր էջ